தொந்தரவு தரும் யானைகளை இடமாறுதல் செய்யலாமா?

2005ம் ஆண்டுக்குப் பிறகே, யானைகளின் நடத்தையில் மாற்றம் ஏற்பட்டு, அடிக்கடி வெளியே வருகின்றன.

அவற்றின் வெளியேற்றத்தை ஆய்வு செய்ததில், நவ., – ஜன., காலகட்டத்தில்தான் அதிகம் வெளியே வந்துள்ளன. இக்காலகட்டத்தில், வனம் செழிப்பாக இருக்கும். எனவே, வனத்துக்குள் உணவில்லாமல் அவை வெளியேறவில்லை என்பது உறுதியாகிறது.

வால்பாறை உதாரணம்

யானைகளைப் புரிந்துகொண்டால், யானை – மனித முரண்பாடுகளைத் தவிர்க்கலாம். இதற்கு வால்பாறை உதாரணம். அங்கு, மக்களிடையே யானைகளின் நடத்தை, நடமாட்டம் பற்றி விழிப்புணர்வு ஏற்படுத்தப்பட்டது. இதனால், 2011க்குப் பிறகு, பிரச்னை இல்லை; யானையால் உயிரிழப்பே இல்லை.

யானைகள், தமது பாதை, எங்கு என்ன இருந்தது, எங்கு என்ன உணவு கிடைக்கும், பழம், பட்டை, கிழங்கு கிடைக்குமிடம் என அனைத்தையும் நினைவில் வைத்திருக்கும்.

கோவை வனக்கோட்டத்தில் 350 யானைகள் இருந்தால், அவை அனைத்தும் வனத்தை விட்டு வெளியேறுவதில்லை.

யானைகளை பிடிக்கும்போது கும்கியைப் பயன்படுத்துதல், மயக்க ஊசி, வாகனத்தில் ஏற்றுதல், மீண்டும் இறக்கி விடுதல் இவற்றின்போது அந்த யானைக்கு உடல், மன ரீதியான பிரச்னை ஏற்படும். சில சமயங்களில் மயக்க ஊசி செலுத்தும்போது, உயிரிழப்புக்கும் வாய்ப்புள்ளது.

வேறிடத்தில் விடும் யானையை, தொடர்ந்து கண்காணிப்பிலேயே வைத்திருக்க வேண்டும். இடுக்கியில் இருந்து களக்காடு முண்டந்துறைக்கு இடமாற்றம் செய்யப்பட்ட அரிசிக்கொம்பன், தொடர் கண்காணிப்பில் இருக்கிறது.

அந்த யானையின் நடத்தையைத் தீவிரமாக ஆய்வு செய்து, அதனைத் தொடர்ந்து வனத்துக்குள் விரட்டி, அதன் நடத்தையை மாற்றுவதற்கு முயற்சிகளை வனத்துறை மேற்கொள்கிறது. வலசைப்பாதை தடைகள் அகற்றப்பட்டு, அகலப்படுத்தப்படுகின்றன.

பயிர் சாகுபடியில் மாற்றம்

மக்களிடையே தொடர்ந்து விழிப்புணர்வு ஏற்படுத்தப்படுகிறது. எலுமிச்சை, நார்த்தை, மிளகாய் என பயிர்சாகுபடி முறை மாற்றம், வழித்தடங்களில் தடை ஏற்படுத்தாமல் இருத்தல், அவை வரும் பாதை, நேரத்தை அறிந்து எதிர்கொள்ளாமல் தவிர்த்தல் போன்றவற்றைத் தொடர்ந்து பின்பற்றினால், யானை–மனித முரண்பாட்டை தவிர்க்கலாம்.

எனவே, விழிப்புணர்வு மட்டுமே இதைச் சாத்தியமாக்கும். மக்களும் ஒத்துழைக்க வேண்டும். நிச்சயமாக யானைகளும் மனிதர்களும் இணக்கமாக வாழலாம். ஆனால் இடம் மாற்றுவது சரியாகாது.

இவ்வாறு, திருநாவுக்கரசு தெரிவித்தார்.