மாநகராட்சியை அண்ணா மார்க்கெட் வியாபாரிகள் முற்றுகை

இப்போது தினசரி வாடகையாக, நாளொன்றுக்கு, 300 ரூபாய், குப்பை வரியாக, 25 ரூபாய் நிர்ணயிக்கப்பட்டுள்ளது. இது, சிறு குறு வியாபாரிகளை அதிர்ச்சியடைய வைத்திருக்கிறது.

வாடகையை குறைக்கக்கோரி, வியாபாரிகள் மற்றும் அவர்களது குடும்பத்தைச் சேர்ந்தவர்கள் என, 900 பேர், டவுன்ஹாலில் உள்ள மாநகராட்சி அலுவலகத்தை நேற்று முற்றுகையிட்டனர்.

ஒரே நேரத்தில் நுாற்றுக்கணக்கானோர் திரண்டதால், பரபரப்பு ஏற்பட்டது. குறைகேட்பு கூட்டத்தில் இருந்த மேயர் ரங்கநாயகி, கமிஷனர் சிவகுரு பிரபாகரன் ஆகியோரிடம், கோவை அண்ணா மார்க்கெட் அனைத்து வியாபாரிகள் சங்கம் சார்பில் மனு கொடுக்கப்பட்டது. கோரிக்கையை பரிசீலிப்பதாக, கமிஷனர் தெரிவித்தார்.

வாழ்வாதாரம் பாதுகாக்கணும்

வியாபாரிகள் சங்கத்தினர் கூறியதாவது:அண்ணா மார்க்கெட்டில் தற்போது, 6க்கு 6 சைஸ் தரைக்கடை ஒன்றுக்கு ரூ.20, 5க்கு 6 சைஸ் மேடைக்கடைக்கு ரூ.50 வீதம் தின வாடகை செலுத்துகிறோம். இதுதவிர, மூட்டைக்கு, 3 ரூபாய் வீதம் சுங்கம் கொடுக்கிறோம்.2024 டிச., மாதம் நடந்த மாமன்ற கூட்டத்தில், மேடை கடை தின வாடகையாக ரூ.300, குப்பை வரி ரூ.25 என நிர்ணயம் செய்யப்பட்டு உள்ளது. தற்போது நிர்ணயம் செய்துள்ள வாடகையால் வியாபாரிகளின் வாழ்வாதாரம் பாதிக்கும்; பொருட்களின் விலை உயரும்.எனவே, மூட்டை சுங்கம், குப்பை வரி சேர்த்து தின வாடகையாக ரூ.100 நிர்ணயிக்க வேண்டுமென கோரியுள்ளோம். நியாயமான வாடகை நிர்ணயித்து, 1,000 குடும்பங்களின் வாழ்வாதாரத்தை பாதுகாக்க வேண்டும்.இவ்வாறு, வியாபாரிகள் கூறினர்.