அசத்திய, மாநகராட்சி பள்ளி மாணவ, மாணவியர் : தினமலர் – பட்டம்’ மெகா வினாடி- வினா போட்டி

‘தினமலர்’ நாளிதழ் மாணவர் பதிப்பு ‘பட்டம்’ இதழ் சார்பில் கோவை மாநகராட்சி பகுதிகளில் முதற்கட்டமாக, 65 பள்ளிகளில் ‘வினாடி-வினா விருது, 2024-25’ போட்டி நடத்தப்படுகிறது.

கோவை மாநகராட்சி மற்றும் இந்துஸ்தான் கல்வி குழுமமும் இணைந்து இப்போட்டியை வழங்குகின்றன. இதில், பள்ளியளவில் முதலிடம் பிடிக்கும் மாணவர்களுக்கு, அரையிறுதி போட்டி நடக்கும். இதில் இருந்து எட்டு அணிகள் தேர்வு செய்யப்பட்டு இறுதிப்போட்டி நடத்தப்படும். போட்டியின் நிறைவில், பரிசுகள் வழங்கப்படவுள்ளன.

* பெரியகடை வீதி, மாநகராட்சி நடுநிலைப்பள்ளியில் நடந்த வினாடி-வினா போட்டியில், தகுதி சுற்றுக்கான பொது அறிவுத்தேர்வை, 35 பேர் எழுதினர். இதில், அதிக மதிப்பெண் பெற்ற, 16 பேர், எட்டு அணிகளாக பிரிக்கப்பட்டு, வினாடி-வினா போட்டி நடத்தப்பட்டது.

தொடர்ந்து, மூன்று சுற்றுகளாக நடத்தப்பட்ட போட்டியின் நிறைவில், ‘ஏ’ அணியை சேர்ந்த எட்டாம் வகுப்பு மாணவர்கள் சரவணகுமார், சுரேன் கார்த்திகேயன் ஆகியோர் முதலிடம் பிடித்தனர். வெற்றி பெற்றவர்களுக்கு, தலைமையாசிரியர் மரகதம் பரிசுகள் வழங்கினார். ஆசிரியர்கள் வாணிஸ்ரீ, குணசுந்தரி, எஸ்தர் லீமா ஆகியோர் உடனிருந்தனர்.