கோவை: ‘மெட்ரோ ரயில்’ திட்டம் செயல்படுத்துவதற்கு ஏற்ப, தேவையான நிலம் கையகப்படுத்தி, கோவை – சத்தி ரோட்டை விஸ்தரிக்க, மாநகராட்சி திட்டமிட்டுள்ளது
கோவையின் வடக்கு பகுதியான கணபதியில், போக்குவரத்து நெருக்கடி நாளுக்கு நாள் அதிகரித்து வருகிறது. டெக்ஸ்டூல் பாலம் முதல் சூர்யா மருத்துவமனை திருப்பம் வரை, ரோட்டை விஸ்தரிக்க மாநகராட்சி திட்டமிட்டது.
நிதி ஒதுக்கீடு
ரோட்டின் இருபுறமும் தலா மூன்று மீட்டர் அகலப்படுத்த, தேவையான நிலம் கையகப்படுத்த, நகரமைப்பு பிரிவினர் அளவீடு செய்தனர்.உள்ளூர் திட்ட குழும நிதியில், 38 கோடியே, 64 லட்சத்து, 81 ஆயிரத்து, 827 ரூபாய், 2020ல் ஒதுக்கப்பட்டது.
நான்கு ஆண்டுகள் கடந்து விட்டதால், தற்போதுள்ள சூழலில் மீண்டும் அளவீடு செய்து, மறு மதிப்பீடு தயாரிக்கப்பட்டது. கூடுதலாக, 15 கோடியே, 35 லட்சத்து, 18 ஆயிரத்து, 173 ரூபாய் தேவையென கணக்கிடப்பட்டது. அதனால், உள்ளூர் திட்ட குழும நிதியில், 54 கோடி ரூபாயை ஒதுக்கக்கோரி, மாமன்ற கூட்டத்தில் தீர்மானம் நிறைவேற்றி, நகர ஊரமைப்புத்துறைக்கு அனுப்பப்பட்டது.
வருகிறது மெட்ரோ
இச்சூழலில், சத்தி ரோட்டின் மையத்தில் ‘மெட்ரோ ரயில்’ வழித்தடம் அமைவதாக, ‘மெட்ரோ ரயில்’ நிறுவனம் தெரிவித்திருக்கிறது. தற்போது ரோட்டை அகலப்படுத்தும்போது, குடிநீர் மற்றும் பாதாள சாக்கடை குழாய், மின் ஒயர் மற்றும் டெலிபோன் கேபிள்களை வேறிடத்துக்கு மாற்ற வேண்டும்.
இதேபோல், மெட்ரோ ரயில் திட்டத்தை செயல்படுத்தும்போது, மீண்டும் வேறிடத்துக்கு மாற்ற வேண்டிய சூழல் ஏற்படும். அதை தவிர்க்க, ஒரே நேரத்தில், ‘மெட்ரா ரயில்’ திட்ட வடிவமைப்புக்கேற்ப, தேவையான நிலத்தை கையகப்படுத்தி, குழாய்களை மாற்றியமைக்க மாநகராட்சி முடிவெடுத்திருக்கிறது.
ஆலோசனைக்கூட்டம்
இதுதொடர்பாக, சென்னை மெட்ரோ ரயில் நிறுவனத்தில் நேற்று ஆலோசனை கூட்டம் நடத்தப்பட்டது. மெட்ரோ நிறுவன மேலாண்மை இயக்குனர் சித்திக், தலைமை பொது மேலாளர் லிவிங்ஸ்டன், கோவை எம்.பி., ராஜ்குமார், மாநகராட்சி கமிஷனர் சிவகுரு பிரபாகரன் ஆகியோர் பங்கேற்றனர்.
சத்தி ரோட்டில் எந்த பகுதியில் மெட்ரோ ரயில் இயக்கப்படும் என்பது தொடர்பாக விளக்கம் கோரப்பட்டது. ரயில்வே ஸ்டேஷனில் இருந்து புறப்படும் மெட்ரோ ரயில், ராம்நகர் வழியாக காந்திபுரம் சென்ட்ரல் பஸ் ஸ்டாண்ட், ஆம்னி பஸ் ஸ்டாண்ட், டெக்ஸ்டூல் பாலம் வழியாக கடந்து செல்லும்.
காந்திபுரம் நஞ்சப்பா ரோடு, கிராஸ்கட் ரோடு, டெக்ஸ்டூல் பகுதியில் பாலங்கள் இருப்பதால், அதன் அருகாமையில் ‘மெட்ரோ ரயில்’ பாதை அமைக்கப்படும். அதன்பின், ரோட்டின் மையப்பகுதியில் பயணிக்கும் என, மெட்ரோ அதிகாரிகள் தெரிவித்தனர். அதனால், மெட்ரோ திட்டத்துக்கு ஏற்ப, தேவையான நிலங்கள் கையகப்படுத்த, மாநகராட்சி திட்டமிட்டுள்ளது.
