பைக்குகளின் வேகத்துக்கு ஏற்ப ரோடுகள் இல்லை! இதை உணர்ந்தால் விபத்துகள் ஏற்படாது

பொள்ளாச்சி நெடுஞ்சாலைத்துறை கட்டுமானம் மற்றும் பராமரிப்பு உட்கோட்டம் சார்பில், தேசிய சாலை பாதுகாப்பு மாத விழிப்புணர்வு பேரணி, திருவள்ளுவர் திடலில் நேற்று நடந்தது.

பேரணியை, கோவை நெடுஞ்சாலைத்துறை சாலை பாதுகாப்பு அலகு கோட்ட பொறியாளர் மனுநீதி துவக்கி வைத்து பேசுகையில், ”கடந்தாண்டில், அதிக விபத்துகள் ஏற்பட்டதில், சென்னைக்கு அடுத்தபடியாக கோவை மாவட்டம் இருந்தது. இதையடுத்து, போலீசார் சோதனை முயற்சிகள், பலவித கட்டுப்பாடுகள் விதித்து, விபத்துகளை கட்டுப்படுத்த நடவடிக்கை எடுத்துள்ளனர். சீட் பெல்ட், ெஹல்மெட் அணிதல் போன்ற விதிமுறைகளை கடைபிடிப்பதால், விபத்துகளை தவிர்க்க முடியும்,” என்றார்.

போக்குவரத்து வார்டன் கமலக்கண்ணன், பொள்ளாச்சி போக்குவரத்து இன்ஸ்பெக்டர் சக்திவேல், நெடுஞ்சாலை உட்கோட்ட அதிகாரிகள் பங்கேற்றனர்.

பள்ளி, மாணவ, மாணவியர் பங்கேற்ற விழிப்புணர்வு பேரணி, திடலில் துவங்கி முக்கிய வீதிகள் வழியாக சென்றது. மாணவர்கள், சாலை பாதுகாப்பு வாசகங்கள் அடங்கிய பதாகைகளை ஏந்தியபடி சென்று, மக்களிடம் விழிப்புணர்வு ஏற்படுத்தினர். பேரணிக்கு முன்னதாக, மாணவர்கள், அதிகாரிகள், சாலை பாதுகாப்பு உறுதிமொழி எடுத்தனர்.