ஐ.டி., நிறுவன ஊழியர் உட்பட மூவர் கைது : பீகாரில் இருந்து துப்பாக்கி வாங்கி வந்து விற்க முயற்சி

கோவை மாவட்டம், சேரன்மாநகர் பகுதியை சேர்ந்தவர் மணிகண்ட பிரபு, 22; ஐ.டி., ஊழியர். இவரது நண்பர்கள் காளப்பட்டி காபி கடை பகுதியைச் சேர்ந்த ஆக்டிங் டிரைவர் ஹரிஸ்ரீ, 23 மற்றும் ஹரிஸ்ரீ வீட்டில் சமையல் வேலை செய்து வந்த பீகார் மாநிலம், பாட்னாவை சேர்ந்த குந்தன்ராய், 22.

மூவரும் அடிக்கடி ஒன்றாக மது அருந்துவது வழக்கம். அவ்வாறு மது அருந்தும் போது குந்தன்ராய், ”பீகார் மாநிலத்தில் நாட்டுத் துப்பாக்கிகள் கிடைக்கும். கள்ளத்தனமாக ஏராளமானோர் வாங்கி வந்து விற்பனையில் ஈடுபடுகின்றனர். விலை ரூ.1 லட்சம் மட்டுமே. நாமும் வாங்கி விற்பனை செய்யலாம்,” எனத் தெரிவித்துள்ளார்.

இதன்படி, மூவரும் துப்பாக்கி வாங்கி விற்பனை செய்ய திட்டமிட்டனர். இத்தகவல் பயங்கரவாத தடுப்பு பிரிவு போலீசாருக்கு தெரியவந்தது. போலீசார் ஒருவரை தயார் செய்து, மணிகண்டபிரபுவிடம் பேச வைத்தனர்.

அந்நபர் மணிகண்டபிரபுவை தொடர்பு கொண்டு, ‘நாட்டுத்துப்பாக்கி வேண்டும், எவ்வளவு தொகை வேண்டுமானாலும் தருகிறேன்’ எனத் தெரிவித்தார்.