மேட்டுப்பாளையம்; ஊட்டி உருளைக்கிழங்குகள் வரத்து குறைந்துள்ளதால், விலை உயர்ந்துள்ளது.
மேட்டுப்பாளையம் நெல்லித்துறை சாலையில், நீலகிரி கூட்டுறவு விற்பனைச் சங்கம், செயல்பட்டு வருகிறது. இங்கு, ஊட்டி, குன்னுார், கோத்தகிரி, கேத்தி, கூடலுார் என பல்வேறு இடங்களில் உற்பத்தி செய்யப்படும் உருளைக்கிழங்குகள் ஏலம் விடப்பட்டு விற்பனை செய்யப்படுகிறது.
கடந்த சில நாட்களாக நீலகிரி மாவட்டத்தில் பெய்து வரும் மழையின் காரணமாக வரத்து குறைந்துள்ளது. இதனால் விலை உயர்ந்து விற்பனையாகி வருகிறது. இதுகுறித்து, கூட்டுறவு விற்பனைச் சங்கம் அதிகாரிகள் கூறுகையில், ஊட்டி உருளைக்கிழங்குகள் நேற்று 500 மூட்டைகள் மட்டுமே வந்தன. அதிகபட்சமாக 45 கிலோ எடை கொண்ட ஒரு மூட்டை கிழங்கு ரூ.2,550 வரை விற்பனை செய்யப்பட்டது. விலை உயர்ந்துள்ளதால், விவசாயிகள் மகிழ்ச்சியடைந்துள்ளனர், என்றார்.
