அரசு மருத்துவமனை முன் தொடருது போக்குவரத்து நெருக்கடி : வாகனம் நிறுத்த கட்டணம் நிர்ணயித்தது மாநகராட்சி

கோவை; கோவை அரசு மருத்துவமனை முன் ஏற்படும் போக்குவரத்து நெருக்கடியை தவிர்க்க, வாலாங்குளத்தின் கரையில் மாநகராட்சி சார்பில் ‘வாகனம் நிறுத்துமிடம்’ ஏற்படுத்தப்பட்டது. இரு சக்கர வாகனங்களுக்கு இரண்டு மணி நேரத்துக்கு, 10 ரூபாய், நான்கு சக்கர வாகனங்களுக்கு, 30 ரூபாய் நிர்ணயிக்கப்பட்டு இருக்கிறது.

கோவை அரசு மருத்துவமனையில் சிகிச்சையில் உள்ள நோயாளிகளின் உறவினர்கள் வரும் இரு சக்கர வாகனங்கள் நிறுத்துவதற்கு, மருத்துவமனை வளாகத்துக்குள் இட வசதியில்லை; ரோட்டில் நிறுத்துவதால் போக்குவரத்து நெருக்கடி ஏற்படுகிறது. இதற்கு தீர்வு காண, மருத்துவமனைக்கு எதிரே வாலாங்குளத்தின் கரையில் வாகனங்கள் நிறுத்த வசதி ஏற்படுத்தி தருவதாக, மாநகராட்சி நிர்வாகம் கூறியது.

அப்பகுதியில் கான்கிரீட் கற்கள் பதித்து, இட வசதி ஏற்படுத்தப்பட்டது; அமைச்சர் செந்தில்பாலாஜி, சில நாட்களுக்கு முன் பயன்பாட்டுக்கு திறந்து வைத்தார். இரு சக்கர வாகனங்கள் இரண்டு மணி நேரத்துக்கு நிறுத்த, 10 ரூபாய்; கூடுதலாக நிறுத்தப்படும் ஒவ்வொரு மணி நேரத்துக்கும், 5 ரூபாய். நான்கு சக்கர வாகனங்களுக்கு, 30 ரூபாய்; கூடுதலாக நிறுத்தப்படும் ஒவ்வொரு மணி நேரத்துக்கும், 15 ரூபாய் கட்டணம் நிர்ணயிக்கப்பட்டு இருக்கிறது.